Përpara një turme entuziaste zëvendëspresidentja Kamala Harris u tha amerikanëve se në nëntor kanë shansin për të hapur një "rrugë të re përpara". Në ditën e katërt dhe të fundit të Kuvendit Kombëtar Demokrat, Harris pranoi zyrtarisht emërimin e partisë si kandidate për presidente. "Në këto zgjedhje, kombi ynë ka një mundësi të çmuar, për të tejkaluar hidhërimin, cinizmin dhe betejat përçarëse të së kaluarës. Një shans për të përcaktuar një rrugë të re përpara, jo si anëtarë të një partie apo fraksioni, por si amerikanë” Harris u bë kështu gruaja e parë me ngjyrë dhe personi i parë me origjinë nga Azia Jugore që pranon emërimin për presidente, nga një parti e madhe dhe nëse zgjidhet, do të jetë presidentja e parë grua e Shteteve të Bashkuara të Amerikës. Gjatë fjalimit të saj Harris premtoi se do të jetë një kandidate për të gjithë amerikanët pa dallim.