Tre ishin porositë kryesore që Edi Rama u la drejtuesve politikë të qarqeve të Partisë Socialiste. I pari lidhej me barazinë gjinore në strukturat drejtuese dhe anëtarësinë e partisë, i dyti verifikimi dhe identifikimi i anëtarësisë fiktive dhe së treti më shumë angazhim prej anëtarësisë dhe takime me qytetarët. Burime të Top Neës nga mbledhja e asamblesë pohojnë se Rama në përgjithësi ka vlerësuar mobilizimin aktual të partisë, por ka pasur rezerva për performancën në disa qarqe. Në lidhje me anëtarësinë fiktive, Rama ka kërkuar që të verifikohet. Porosia e tij ka qenë që të mos fshihet menjëherë, por të bëhen përpjekje që këtë pjesë të fjetur të organizatës ta zgjojnë. Nuk mungojnë njerëzit që duan të hyjnë në PS, tha Rama, por mungojnë dyert e hapura për ta. Ato dyer duhet t’i hapni ju duke i shqyer’, ka qenë porosia e kryesocialistit. Për barazinë gjinore, Rama solli si shembull Qarkun e Dibrës, ku strukturat bashkëdrejtohen mes burrave dhe grave.