Kryeministri i Polonisë, Donald Tusk do të vizitojë Berlinin dhe Parisin, në një përpjekje për normalizimin e marrëdhënieve të dëmtuara me dy vendet e mëdha të bllokut evropian. Vizita e kryeministrit polak në dy kryeqytete europiane brenda një dite është e shkurtër, por me rëndësi të madhe. Donald Tusk do të takojë në fillim presidentin francez, Emmanuel Macron e më pas kancelarin gjerman, Olaf Scholz në Berlin. Për kryeministrin polak vizita në Berlin do të jetë një akt ekuilibrues. Nga njëra anë ai do të riparojë marrëdhënien e dëmtuar me Gjermaninë këto vite, por duhet të ketë kujdes të mos tregojë shumë afërsi me fqinjin perëndimor. Sepse partia konservatore polake, Ligj dhe Drejtësi, e Jaroslaë Kaczynskit, që e ka shpallur Tuskun "agjent gjerman" do të ndjekë çdo hap të tij në Berlin. Partia e Kaczynskit që e qeverisi Poloninë në tetë vitet e fundit, e dëmtoi jo pak politikën europiane të Polonisë. Ajo vendosi të ketë lidhje të ngushta ushtarake me SHBA, por partneri i preferuar ishte Donald Trump, dhe dëmtoi marrëdhëniet me Francën dhe Gjermaninë. Marrëdhëniet gjermano-polake janë në krizën më të thellë që nga rënia e Perdes së Hekurt. Në fushatën zgjedhore në tetorin e kaluar, partia e Kazinskit madje e shpalli Gjermaninë si rrezikun më të madh për sovranitetin e Polonisë, dhe Tuskun e cilësoi përfaqësues të interesave të huaja, sidomos atyre gjermane. Pas dështimit në zgjedhje, Kaczynski madje e forcoi retorikën antigjermane. Ai i krahasoi përpjekjet e Donald Tusk për të rivendosur shtetin ligjor në Poloni me metodat e Adolf Hitlerit. Pas betimit të qeverisë së re polake në dhjetor 2023, entuziazmi në Berlin nuk fshihej. Kancelari gjerman e uroi Donald Tusk spontanisht për marrjen e detyrës dhe i ofroi bashkëpunim. Por u deshën të kalojnë gati dy muaj që Tusk të merrte rrugën drejt kryeqytetit gjerman. Procesi i vështirë i marrjes së pushtetit nga Tusk, e çoi në rend të dytë politikën e jashtme.