Kur ndodhemi më pak se një vit larg zgjedhjeve lokale, partitë politike duket se kanë nisur fushatën. Partia Socialiste prej javësh vijon takimet me strukturat nga Kryeqyteti e në çdo rreth, teksa shpërfaq synimet e saj jo vetëm për pushtetin lokal por edhe për atë qendror, duke synuar kështu edhe mandatin e katërt qeverisës. Nga ana tjetër Partia Demokratike nëpërmjet ish-kryeministrit Sali Berisha, vijon strategjinë e saj në prag zgjedhjesh. Berisha po zhvillon takime me profesionistë të fushave të ndryshme por edhe me grupe të caktuara interesi, duke shpërfaqur edhe planin e tij, apo edhe premtimet nëse Partia Demokratike do të arrij të fitojë në zgjedhje. Ai ka kërkuar mbështetjen e qytetarëve për realizimin e ndarjes së re administrative, pasi shfaqet i bindur se drafti i propozuar prej ekspertëve pranë PD, nuk do të miratohet nga qeveria.