Pasuria kinematografike që la pas mjeshtri i madh, Dhimitër Anagnosti i mbijetoi brezave, ndaj sot i madh e i vogël ndjen boshllëk pas shuarjes në moshën 89 vjeçare të kineastit të njohur që i dhuroi publikut shqiptar filma të pazëvendësueshëm. Presidenti i Republikës, Bajram Begaj shkruan se plejadës së artistëve të mëdhenj shqiptarë iu shkëput një tjetër yll, arti i madh i të cilit do të vazhdojë të magjepsë shqiptarët. Kryeministri Edi Rama e cilëson Anagnostin, babain e kinemasë shqiptare duke ndarë copëza kujtimesh me të që në moshë të hershme. Facebook Rama: “Babai i kinemasë shqiptare, autori i shumë skenarëve që shenjuan rrugën e kinematografisë sonë të re në një kohë tejet të vështirë për ëndrrat krijuese, regjisori i plot filmave të arrirë dhe i filmit kult “Lulëkuqe mbi mure” që ka mbetur sot e gjithë ditën si kryetitulli i ekranit të historisë së filmit shqiptar, mjeshtri i shumërespektuar nga i madh e i vogël dhe vunjotësi kryeneç që mezi e priste verën për t’u arratisur nga qyteti e shkuar poshtë, tek shtëpia e fëmijërisë në Vlorë, e më vonë tek kasollja e tij buzë detit në Jalë, Barba Taqo siç e njoha unë kur isha fare i vogël e ai ende shumë i ri apo Dhimitër Anagnosti, siç e njohin të gjithë dashamirët e filmit dhe tërë ata që e deshën a jo, ndërroi jetë pasi jetoi gjithnjë me kokën lart. Lamtumirë Barba Taqo, u prehsh në paqe Grand Master”