Me urdhër nga SPAK, policia ushtroi kontrolle në Surrel në dy banesa të Ervis Martinajt, i cili rezulton i zhdukur prej 9 gushtit të vitit të kaluar. Në momentin kur efektivët e policisë zbarkuan në banesë asnjë prej familjarëve të Martinajt nuk ishte i pranishëm. Mësohet se janë marrë vetëm disa dokumente dhe nuk është gjetur asgjë e paligjshme. Kontrollet policore, të kësaj të shtune, janë në funksion të operacionit ‘Plumbi i Artë’, pas rrëfimit të të penduarit të drejtësisë Nuredin Dumani i cili dëshmoi se ishte paguar nga Martinaj për të eleminuar Endrit Doklen, porosi që nuk u krye. 12 ditë më parë policia e shtetit ndërmori kontrolle të befasishme në disa banesa dhe ambiente në Fushë Kuqe, në pronësi të Ervis Martinajt dhe dy xhaxhallarëve të tij. Në cilësinë e provës materiale u sekuestruan 2 armë zjarri, mijëra municione luftarake, radio, fenelina, uniforma policie, maska dhe sende të tjera të kundërligjshme. Zhdukja e mbretit të lojërave të fatit nuk është zbardhur ende. Drejtori i përgjithshëm i policisë, Muhamet Rrumbullaku ka zhvilluar disa takime me Prokurorinë e Posaçme, megjithatë prej pesë muajsh nuk ka ende një përgjigje zyrtare se çfarë ka ndodhur me Ervis Martianjn.