Një shtetas shqiptar është vënë në pranga në ishullin grek të Kretës, pasi ishte shpallur në kërkim nga autoritetet në Shqipëri. Policia greke rezervohet për të zbuluar identitetin e shqiptarit të arrestuar, por bëhet me dije se është një 38-vjeçar i dënuar me 20 vite burg, pasi ndaj tij rëndon akuza e vrasjes së mbetur në tentativë. Paraprakisht mësohet se ngjarja ka ndodhur verën e 2022-shit në Shqipëri dhe 38-vjeçari ia ka dalë të largohet drejt Greqisë. Ai u arrestua teksa po lëvizte me mjetin e tij në zonën e Neapolit, në Lasithi. Shqiptari jetonte në Greqi, ku kishte aplikuar edhe për leje qëndrimi për arsye pune, teksa identifikimi itij u bë pikërisht nga leja e drejtimit të mjetit. Aktualisht 38-vjeçari është shoqëruar në komisariatin e Heraklionit, ku pritet t’u nënshtrohet procedurave të ekstradimit drejt Shqipërisë.