Policia Rrugore vijon me dorë të hekurt të godasë shkeljet e kodit të qarkullimit rrugor dhe të punojë për rritjen e sigurisë. Në këtë kuadër goditjes së shkeljeve në këtë aspekt janë arrestuar apo proceduar 15 drejtues mjetesh, përkatësisht 3 persona për drejtim mjeti në gjendje të dehur, 8 persona për shkak se nuk kishin leje drejtimi, 3 persona për shkelje të rregullave të qarkullimit dhe 1 shofer për shkak se drejtonte mjetin nën ndikimin e drogës. Po në këtë kuadër janë marrë 11 721 masa administrative, të cilat në një mesatare janë 1674 të tilla në ditë, për shkelje të ndryshme të kodit rrugor. Krahas këtyre masave administrative janë pezulluar 59 leje drejtimi për shkelje të ndryshme, ku 22 prej tyre për shkak të shpejtësisë së lartë, si dhe janë bllokuar 5 automjete, përfshi 1 me targa të huaja.