Kryeministri britanik, Rishi Sunak, prezantoi para dhomës së komuneve në britani, planin e qeverisë së tij për të luftuar emigracionin e paligjshëm. Dhe në qendër të këtij plani janë emigrantët shqiptarë, për të cilët ai tha se ndryshimet e propozuara në sistem duhet të cojnë në refuzimin masiv të aplikimeve të shqiptarëve për azil. Sunak tha se thuajse një e treta e azilkërkuesve në britani janë shqiptarë, por sipas tij, Shqipëria është një vend i sigurt dhe i prospertë. Ai tha se të ardhurit do të mund të pretendojnë se janë viktima të skllavërisë moderne vetëm nëse ka prova për këtë dhe jo thjeshtë dyshime. Kjo dhe të tjera ndryshime, sipas Sunak, duhet të cojnë në shpalljen e pjesës dërrmuese të kërkesave për azil të shqiptarëve, si të pabaza dhe pas kësaj, do të ketë kthime të shpejta në vendin e tyre. Për më tepër, Sunak tha se do të sigurohet që të gjithë shqiptarët që janë në listë pritjeje të largohen shpejt prej saj ndërkohë që qeveria është e angazhuar që të fillojë shpejt fluturimet drejt Ruandës për ti dërguar azilkërkuesit atje.