I ftuari i kryeministrit Edi Rama në episodin e katër të podcastit, ishte demokrati prej 32 vitesh, Agim Xhindoli, i cili operon në fushën e biznesit. Duke lënë mënjanë bindjet politike, sipërmarrësi falenderoi Ramën për vizitën në biznesin e tij, duke u shprehur se Rama ishte i pari kryeministër që zhvilloi një takim me të si sipërmarrës. “Unë dhe familja ime e them me plot gojën, që jemi të vetmit gjatë 32 viteve që nuk kemi luajtur nga PD dhe jemi te PD, atje ku kam kontributin 32 vjeçar unë dhe familja ime. Jemi të drejtpërdrejtë, nuk fshihemi. Prandaj respektohemi se jemi të drejtpërdrejtë. Japim kontributin tonë, por s’kam asnjë kompleks. Unë në biznes nuk kam as 3 ditë, as tre muaj, as 3 vjet, në 1 maj tani, mbush 29 vjet - dhe nuk ka ardhur njeri nga politika, nga PD që unë kam kontributin tim familjar, të më ketë vizituar fabrikën, as për mire, as për keq. Dhe kur erdhët atë ditë dhe më thatë: e keni kompleks? Ju thashë: kompleks nuk kam, biles jam më i lumturi i botës që po vjen një kryeministër”