Ish-presidenti amerikan, Donald Trump, përsërit vazhdimisht se është në pozicionin e duhur për të negociuar fundin e luftës në Ukrainë, duke thënë se ka marrëdhënie të mira si me presidentin rus, Vladimir Putin, ashtu edhe me atë ukrainas, Volodymyr Zelensky. Trump, shkruan REL, gjatë karrierës së tij politike, ka lavdëruar në mënyrë të përsëritur Putinin... madje edhe pas pushtimit të Ukrainës, në shkurt të vitit 2022. Vetëm pak ditë pasi tanket ruse kanë hyrë në territorin e shtetit fqinj, Trump e ka përshkruar liderin rus si lojtar “të zgjuar” politik dhe ka shprehur admirim për, siç ka thënë ai, faktin që Rusia ka marrë shpejt “një copë të madhe toke” me koston e, sipas tij, sanksioneve relativisht të lehta. Trump ka qenë vazhdimisht kritik edhe ndaj përfshirjes së SHBA-së në luftën në Ukrainë, duke thënë se në vend se t’i jepte ndihmë, do të duhej t’i jepte kredi. Këtë gjë e ka përsëritur edhe pak javë më parë në Ohajo, derisa ka bërë fushatë për kandidaturën e tij për president në zgjedhjet që do të mbahen në nëntor.