Kreu i Bashkisë Erion Veliaj ka pritur në takim kryebashkiakun e Prishtinës, Përparim Rama dhe për herë të parë në Tiranë kryebashkiakun e Athinës, Haris Doukas, të cilët morën pjesë në punimet e Samitit të B40. Gjatë takimit me Përparim Ramën, Veliaj theksoi bashkëpunimin e shkëlqyer mes Tiranës dhe Prishtinës, për të mësuar më shumë dhe për të marrë më të mirën nga njëri-tjetri. “Është një bekim i madh sot që vëllai im, Përparimi, është në Tiranë dhe këtë xhamadan kuq e zi ia dhuroj edhe për simbolikën e transferimit të një titulli shumë të rëndësishëm, si “Qyteti Europian i Sportit” nga Tirana në Prishtinë, me shpresën se do të jetë pa dyshim një energji kuq e zi, por edhe një punë e mirë për qytetin dhe përgatitjen e një organizimi tjetër të madh, atë të Lojërave Mesdhetare. Gjatë vitit të sportit ne nuk përgatitëm vetëm sportistët për olimpiadë, por përgatitëm kryesisht ‘olimpiadën’ e qytetit tonë, pra njerëz që formojnë karakterin, që dinë çfarë është humbja dhe fitorja, që dinë të luajnë në skuadër, hapëm palestrat për komunitetin dhe regjistruam pa fund fëmijë në kurse, çka besoj se do të vazhdojë edhe pas titullit”. Nga ana tjetër në takimin e kryebashkiakun e Athinës, Veliaj tha se i vjen mirë që udhëtimi i tij i parë është në Tiranë.