Shefi më jetëgjatë i kabinetit i ish-Presidentit Donald Trump po paralajmëron se kandidati presidencial republikan plotëson kriteret e përkufizimit si një fashist dhe thotë se kur ishte në detyrë, ai kishte sugjeruar se Adolf Hitler "kishte bërë disa gjëra të mira". Gjenerali në pension John Kelly, i cili shërbeu në Shtëpinë e Bardhë nga viti 2017 deri në vitin 2019, i bëri komentet në intervista për gazetën The Neë York Times dhe revistën The Atlantic. Komentet vijnë në vazhdën e paralajmërimeve të kaluara të ish-zyrtarëve të lartë të administratës së ish-presidentit Trump dhe bëhen ndërsa kanë mbetur më pak se dy javë nga zgjedhjet e fundit. Rivalja demokrate e Trump, Kamala Harris tha se këto komente tregojnë se kush është "në të vërtetë" ish-presidenti dhe se çfarë lloj komandanti i përgjithshëm do të ishte ai. Gjen. Kelly ka qenë prej kohësh kritik i Trump dhe e ka akuzuar atë se i ka quajti veteranët e luftës "dështakë”. Paralajmërimet e tij të fundit vijnë ndërsa republikani Trump po kërkon një mandat të dytë dhe gjatë fushatës është zotuar se do të zgjerojë në mënyrë dramatike përdorimin e ushtrisë dhe ka lënë të kuptohet se do të përdorte forcën ndaj amerikanëve që ai i konsideron "armiq të brendshëm". Ai kishte thënë më shumë se një herë se hitleri ka bërë edhe gjëra të mira – kujton Kelly në intervistën për Neë York Times duke shtuar se vetë ai zakonisht i mbyllte këto biseda duke thënë se asgjë që ka bërë hitleri nuk ka qenë e mirë. Në intervistën me revistën Atlantic, Kelly kujton se kur ish-Presidenti Trump ngriti idenë e nevojës për "gjeneralë gjermanë", ai e kishte pyetur nëse e kishte fjalën për "gjeneralët e Bismarkut", duke iu referuar Otto von Bismarkut, kancelarit që mbikëqyri bashkimin e Gjermanisë. “Me siguri nuk e keni fjalën për gjeneralët e Hitlerit”, e kishte pyetur ai. Ndërsa ish-presidenti ishte përgjigjur: "Po, po, gjeneralët e Hitlerit". Zëdhënësi i fushatës së Trump, Steven Cheung i mohoi këto pohime, duke thënë se Kelly "e kishte bërë veten qesharak duke përhapur këto histori të sajuara". Harris ndërkohë përsëriti paralajmërimet e saj për gjendjen mendore të Trump dhe synimet e tij për presidencën.