Një ngjarje e rëndë është regjistruar pasditen e të enjtes në fshatin Ballagat të Lushnjës, teksa një 60-vjeçare ka mbetur e plagosur në këmbë. Shtetasi A.H. ka plagosur me armë 60-vjeçaren B.S, banuese në fshatin Ballagat. E plagosura është dërguar menjëherë në spital, ku po i jepet ndihma e parë mjekësore, teksa policia raporton se është jashtë rrezikut për jetën. Ndërkohë autori i krimit është larguar menjëherë nga vendi i ngjarjes dhe policia ka ngritur grupe kontrolli për të bërë të mundur arrestimin e tij. Grupi hetimor ka mbërritur menjëherë në vendngjarje dhe po merr në pyetje të afërm të të plagosurës, për të mësuar më shumë mbi shkaqet e konfliktit. Paraprakisht dyshohet se palët kishin një debat për pronën, për të cilën i ishin drejtuar edhe gjykatës, por duket se tensioni agravoi sot në përdorimin e armës.