Deputetja socialiste, Klotilda Bushka do dëgjohet nga grupi parlamentar lidhur me ekspozimin e emrit të saj në dosjen hetimore të SPAK, ku dyshohet se ka asgjësuar telefonin e shtetases Ina Goxhaj, pasi kjo e fundit është thirrur nga SPAK për të dhënë deklarimet e saj. Për këte arsye, dyshohet se Bushka ka kryer veprime që pengojnë zbulimin e së vërtetës. “Jam “pa fjalë” prej 24 orësh që figurokam edhe unë në listën e gjatë të emrave që ka grumbulluar SPAK-u për të lënë Tiranën pa kryetar bashkie, bazuar në dyshime të lidhura me njëra-tjetrën si në një film, për të cilat maksimumi i akuzave për Erjon Velinë dhe Ajola Xoxën, mund të ngrihej në gjendje të lirë. Por kjo është një temë tjetër. Pyetja ime është ku hyj unë në këtë mes dhe pse duhet të më takonte sipas SPAK-ut balta që i shoqëron këto goditje të tij, për të cilat më shpejt vihen në dijeni disa gazetarë “specialë”, se sa kush përgojohet pa u pyetur fare?” – thuhet në reagimin e Bushkës. Deputetja pranon miqësinë me bashkëshorten e kryebashkiakut të Tiranës, Ajola Xoxën që nga fëmijëria, njëkohësisht shfaqet krenare për miqësinë me Erion Veliajn dhe punën që ai ka bërë për Tiranën.