Komisioni për Politikë të Jashtme i Parlamentit Evropian miratoi të mërkurën raportin për Kosovën dhe amendamentet e paraqitura nga deputetët për këtë raport. Drafti i raportit u prezantua nga Viola Von Cramon, që është raportuese për Kosovën në Parlamentin Evropian, ndërsa në këtë raport janë paraqitur mbi 300 amendamente nga deputetë të ndryshëm. Raporti për Kosovën u miratua me 44 vota pro, tetë kundër dhe tre abstenime. Raporti përmban pikat e përgjithshme ngjashëm me raportet e viteve të shkuara, por ka marrë parasysh këtë radhë edhe zhvillimet që kanë ndodhur ndërkohë. Me këtë raport mirëpritet aplikimi i Kosovës për anëtarësim në Bashkimin Evropian, që reflekton orientimin pro-evropian të qytetarëve të saj dhe përcaktimin e qartë gjeopolitik. Ndërkaq, përshëndetet edhe vendimi i shumëpritur për liberalizimin e vizave për qytetarët e Kosovës, proces i cili u përmbyll të martën kur vendimi edhe u botua në Gazetën Zyrtare të BE-së, pasi më herët ishte nënshkruar nga Parlamenti dhe Këshilli i BE-së. Parlamenti Evropian ka insistuar për shumë vite që liberalizimi i vizave të ndodhë sa më shpejt. Së fundi u arrit pajtimi edhe mes PE-së dhe Këshillit të BE-së për këtë çështje. Një thirrje që Parlamenti Evropian e përsërit cdo vit në raportet për Kosovën, është përfshirë në tekst edhe kësaj radhe. Kjo është thirrja për njohjen e pavarësisë së Kosovës nga të gjitha vendet anëtare të Bashkimit Evropian.