Pesë persona kanë mbetur të plagosur, prej të cilëve dy në gjendje më të rëndë shëndetësore si pasojë e një aksidenti të ndodhur pasditen e së dielës në aksin Përrenjas-Pogradec. Në aksident janë përfshirë një autobus dhe një autoveturë tip Mercedes Benz. Nga përplasja mes dy mjeteve, ka shpërthyer në flakë autovetura, duke shkaktuar plagosjen e pesë personave. Dy prej tyre, që janë në rrezik për jetën janë transportuar me helikopter drejt Spitalit të Traumës në Tiranë, ndërsa tre të tjerët morën kurimin në spitalin e Përrenjasit. Policia po heton shkaqet e ngjarjes. Paraprakisht dyshohet se autovetura që po udhëtonte nga Përrenjasi në drejtim të Pogradecit i ka prerë rrugën autobusit që udhëtonte nga Pogradeci në drejtim të Përrenjasit. Si pasojë e aksidentit, rruga është bllokuar për disa minuta, duke shkaktuar rradhë të gjata trafiku.