Kryetari i Bashkisë së Tiranës, Erion Veliaj, së bashku me ministren e Arsimit dhe Sportit, Ogerta Manastirliu, inspektuan përfundimin e punimeve, në shkollën e re të bashkuar “Bedri Llagami’, në Vaqarr. Veliaj theksoi se kjo shkollë do të shërbejë dhe si epiqendër e aktiviteteve komunitare. Veliaj: “Të sigurohemi që kjo epiqendër të shërbejë edhe si një horizont për fëmijët. Nuk kemi ndërtuar vetëm ca mure me llaç e tulla apo xhama e dritare, kemi ndërtuar një komunitet. Patjetër, Tirana ofron shumë, por unë besoj se për çdo prind, të pasurit e fëmijës tek oborri i shkollës, tek një mjedis i sigurt, ofron një garanci të jashtëzakonshme sigurie.” Kryebashkiaku u shpreh se puna për ndërtimin e institucioneve të reja arsimore do të vijojë edhe në zonën e Astirit, në Sauk dhe në zonën “Ali Demi”.