Situata e krijuar nga përmbytjet në Shkodër, Durrës, Fier dhe Vlorë është përmirësuar me ndalimin e reshjeve të shiut dhe rënien e nivelit të lumenjve. Autoritetet njoftojnë se në Shkodër përurjet e Drinit dhe shkarkimet në Vaun e Dejës janë brenda kuotave normale të stinës, ndërsa në Obot dhe Dajç, në 12 orët e fundit niveli i ujit ka rënë me 10 centimetra. Në Obot ka banesa me prezencë uji në oborre, ndërsa deri në këto momente nuk ka raportime për prezencë uji në brendësi të tyre. Në Njësinë Administrative Dajç, në zonën Urrelat – Shirq vijon të ketë prezencë uji në kanalet kulluese të tokave bujqësore, por pa depërtim në banesa. Në total, në qarkun e Shkodrës janë 1520 hektarë tokë e përmbytur. Në Qarkun e Durrësit autoritetet raportojnë se të gjithë lumenjtë e përrenjtë janë rikthyer në shtrat, duke përmirësuar situatën. Prani uji ka ende në zonën e ish Kënetës, në Sukth, Katund të Ri dhe Hamallaj.