Greqia po përballet me probleme të shumta në pjesën perëndimore pas reshjeve intensive që goditën këtë zonë. Fusha të përmbytura, rrëshqitje dheu dhe fshatra të izoluara është tabloja që shfaqet në Epir, Korfuz dhe Kostur. Mediat greke raportojnë se në shumë fshatra mungon energjia elektrike ndërsa gjashtë bashki të Epirit kanë shpallur gjendjen e emergjencës. Në zonat malore janë krijuar erozione të rrezikshme nën themelet e banesave. Ekipe të posaçme të bashkisë, rajonit dhe Ministrisë së Krizave Klimatike kanë filluar inspektimet për të përllogaritur dëmet në infrastrukturë që llogariten në disa miliona euro.