Të paktën pesë persona kanë humbur jetën pasi stuhia tropikale, Debby, goditi Floridën, duke kërcënuar me shira të rrëmbyeshëm dhe përmbytje katastrofale në të gjitha shtetet në juglindje të SHBA-së. Një djalë 13 vjeç humbi jetën në kontenë Levi, pasi një pemë ra mbi shtëpinë e tij, ndërsa stuhia Debby goditi brigjet e Floridës të hënën, si uragan i kategorisë 1. Autoritetet thanë po ashtu se një shofer kamioni humbi jetën pasi ra me gjithë kamion në një kanal në kontenë Hillsbrou, ndërkaq një grua 38 vjeçe dhe një djalë 12 vjeç mbetën të vdekur pas përplasjes së makinës së tyre në Diksi. Gjatë natës, stuhia u zhvendos drejt Xhorxhias dhe sipas Qendrës Kombëtare amerikane për Uragane pritet që stuhia më pas të lëvizë drejt Karolinës së Jugut. Drejtori i Qendrës Kombëtare për Uragane, Michael Brennan, tha se rreziku i shirave të rrëmbyeshëm nga kjo stuhi është shumë i madh, duke paralajmëruar për përmbytje potencialisht katastrofike në pjesë të Xhorxhias, Karolinës së Jugut dhe Karolinës së Veriut. Guvernatori i Floridës, Ron DeSantis, tha se afër 250.000 banorë në këtë shtet mbetën pa energji elektrike. Ai u bëri thirrje qytetarëve për kujdes. Por, shtoi se erërat e shkaktuara nga stuhia Debby nuk janë aq të fuqishme sa uraganet paraprake që kanë goditur Floridën. Presidenti amerikan, Joe Biden, ka miratuar shpalljen e gjendjes emergjente në Florida dhe Karolinën e Jugut, duke lejuar ndihmën federale për të koordinuar përpjekjet për ndihmë lidhur me katastrofat natyrore. DeSantis po ashtu ka aktivizuar Gardën Kombëtare dhe më shumë se 3.000 pjesëtarë të Gardës janë mobilizuar për të ndihmuar qytetarët pas kësaj stuhie. Qendra Kombëtare për Uragane tha se të hënën erërat e stuhisë Debby arritën deri në 75 kilometra në orë, ndërsa ajo goditi Xhorxhian. Sipas kësaj qendre, kjo stuhi pritet të sjellë “reshje historike” shiu, ndërsa lëviz drejt veriut të SHBA-së.