Një cisternë me flamur të Filipineve që transportonte 1.4 milionë litra naftë u mbyt në Manila të enjten, thanë autoritetet, ndërsa ka filluar një betejë për frenimin e derdhjes së karburantit në det. Një anëtar i ekuipazhit të MT Terra Nova humbi jetën kur cisterna u përmbys në gjirin e Manilas, ndërsa lundronte për në qytetin qendror Iloilo. Anija u përmbys në det të trazuar ndërsa shirat e dendur të nxitur nga tajfuni Gaemi dhe musonet sezonale goditën Manilën dhe rajonet përreth saj ditët e fundit. Është zbuluar një njollë nafte që shtrihet disa kilometra dhe roja bregdetare e Filipineve po merr masat përkatëse dhe po vendos barriera lundruese për të frenuar derdhjen. Zëdhënësi i rojes bregdetare tha në një konferencë për shtyp se autoritetet ishin në "garë me kohën" për të frenuar rrjedhjen e karburantit. Nëse i gjithë karburanti që ndodhet në bord do të përfundonte në det, kjo do të ishte katastrofa më e madhe ekologjike në historinë e filipineve. Zyrtarët thanë se 16 nga 17 pjesëtarët e ekuipazhit ishin shpëtuar. Trupi i pajetë i një prej pjesëtarëve u gjet pasi ekipet e shpëtimit kaluan orë të tëra duke kërkuar në ujërat e trazuara. Tani ka nisur një hetim për ngjarjen, por raportohet se anija nuk kishte shkelur rregullat e lundrimit në mot të vështirë.