Kjo e mërkurë shënon 20-vjetorin e ndarjes nga jeta të presidentit historik të Kosovës, Ibrahim Rugova. Në nderim të kujtimit të tij, emra të njohur të politikës kanë bërë homazhe në vendin ku ai prehet, duke e kujtuar si figurën që bashkoi qytetarët rreth kauzës për liri, pavarësi dhe demokraci. Gjatë homazheve, politikanët dhe qytetarët theksuan kontributin e Rugovës në ndërtimin e institucioneve dhe në afirmimin e vlerave demokratike të Kosovës. Mes mesazheve dhe fjalëve përkujtimore, u rikujtua edhe angazhimi i tij i palodhur për paqe dhe stabilitet në rajon. “Presidenti Rugova, bëri bashkë gjithë popullin e Kosovës rreth kauzës për liri pavarësi dhe demokraci, kauzë kjo që është akoma e gjallë dhe është jetësuar për shkak të sakrificës së madhe të popullit tonë, luftës sonë çlirimtare dhe ndërtimit të aleancave me aleatët tanë strategjik brenda familjes euroatlantike, aleanca këto që i ndërtoi presidenti Rugova me një vizion të pashoq, vizion ky i cili edhe sot mbet dritë udhërrëfyese për gjithësecilin prej nesh, që e duam Kosovën akoma më të fortë dhe të integruar në strukturat euroatlantike.”