Kreu i Lëvizjes Vetëvendosje, njëherësh kryeministri në detyrë i Kosovës, Albin Kurti, dhe udhëheqësi i Nismës Socialdemokrate, Fatmir Limaj u takuan këtë të shtunën, por ende nuk dihet nëse kanë arritur marrëveshje për daljen nga ngërçi politik, që do të mundësonte krijimin e institucioneve të reja. Eksponentët e dy partive konfirmuan më herët se ky takim do të mbahej, por nuk dhanë detaje për të. Takimi u mbajt teksa po afrohet afati i 26 korrikut, i vendosur nga Gjykata Kushtetuese për konstituimin e përbërjes së re parlamentare të dalë nga zgjedhjet e shkurtit. Deputetja e Nismës Socialdemokrate, Xhevahire Izmaku, deklaroi se partia e saj mban qëndrimin që Limaj të zgjidhet në postin e kryeparlamentarit, ndërkaq LVV-ja si fituese e zgjedhjeve, të drejtojë Qeverinë e re. Ajo tha se partia e saj e ka ofruar bashkëpunimin, duke thënë se zgjedhja e Limajt në krye të organit ligjvënës nuk është kusht, por mundësi që vendi të dalë nga ngërçi dhe të formohen institucionet e reja. Ndërsa Artan Abrashi nga LVV-ja, pas seancës konstituive të Kuvendit, deklaroi se partia e tij është konstruktive teksa akuzuar partitë e tjera se nuk kanë reflektuar pas aktgjykimit të Gjykatës Kushtetuese. Duke folur për takimin Kurti-Limaj dhe mundësinë e një marrëveshjeje, ai tha se “bashkëpunimi nënkupton bashkëqeverisje, pjesëmarrje në bashkëqeverisje”. Të shtunën, për herë të 49-të deputetët dështuan ta konstituonin përbërjen e re parlamentare. Deputetët e partive që mandatin e kaluar ishin në opozitë po kundërshtojnë votimin e fshehtë për zgjedhjen e kryeparlamentarit, duke argumentuar se një votim i tillë është jokushtetues.