Është përcjellë në banesën e fundit Elidon Kelmendi, vëllai i këngtarit të njohur nga Kosova Gjesti, i cili humbi jetën mesditën e së premtes, si pasojë e një aksidenti. Familjarë dhe të afërm u panë në ceremoninë mortore, teksa trupi i pajetë i 15 vjecarit do prehet në varrezat e fshatit Bllagajë të Pejës në Kosovë. Pamjet që u shpërndanë në rrjetet sociale treguan dhjetra persona që iu gjenden pranë familjes Kelmendi në këtë moment, teksa nuk munguan as personazhet publikë, të cilët reaguan edhe përgjatë së premtes kur ndodhi tragjedia e rëndë. Aksidenti i rëndë u shënua rreth orën 14.00 të premten në fshatin Qungur të Pejës, kur një automjet përplasi motocikletën me të cilën lëvizte 15 vjecari Elidon Kelmendi, duke e lënë këtë të fundit të vdekur në vend. Si pasojë e aksidentit mbeti i plagosur rëndë edhe një person, i cili po merr mjekim në spitalin e Pejës. Ngjarja e rëndë shkaktoi tronditje në mbarë opinionin publik, për shkak të vdekjes së të miturit, teksa reagim masiv pati edhe nga mbështetësit e artit të Gjestit si dhe nga kolegët e tij.