Paketat e ndihmës ushtarake amerikane për Ukrainën kanë qenë më të vogla në muajt e fundit, pasi rezervat e armëve dhe pajisjeve që Pentagoni është i gatshëm t'i dërgojë Kievit nga inventari i tij janë pakësuar. Ndryshimi vjen mes shqetësimeve rreth ndikimit që kjo do të ketë në gatishmërinë ushtarake të SHBA-së, ndërsa prodhuesit amerikanë të armëve po përballen me kërkesën e madhe të krijuar nga lufta kundër Rusisë. Mungesa do të thotë se administrata Biden ka ende 6 miliardë dollarë fonde në dispozicion për të armatosur dhe pajisur Ukrainën, por Pentagonit i mungon inventari që ai do të donte t’i dorëzonte Kievit, më shumë se dy vjet pas luftës, thanë dy zyrtarë amerikanë për CNN. “Ka të bëjë me rezervat që kemi në magazinat tona, çfarë kërkojnë ukrainasit dhe nëse ne mund t'i përmbushim ato kërkesa me atë që kemi aktualisht” pa ndikuar në gatishmërinë tonë, tha një nga zyrtarët. Pentagoni i ka kërkuar Kongresit më shumë kohë për t'i shpenzuar ato para përpara se të skadojnë në fund të shtatorit, sipas gjeneralmajor Pat Ryder, sekretari i shtypit në Pentagon. Është një ndryshim i madh në krahasim me dimrin e kaluar, kur administrata Biden po i lutej ligjvënësve për fonde shtesë për të mbështetur Ukrainën kundër pushtimit të Rusisë. Rimbushja e boshllëqeve të shkaktuara nga dërgimi i armëve e municioneve në Ukrainë, është gjithashtu problem. SHBA po rrit prodhimin e artikujve kryesorë, të tillë si municionet 155 mm dhe sistemet e raketave Patriot, si për të furnizuar Ukrainën ashtu edhe për të rimbushur inventarët e veta. Por është një proces shumëvjeçar që nuk do të përmbushë shpejt kërkesën në rritje. Para luftës në Ukrainë, SHBA prodhonte afërsisht 15,000 predha artilerie 155 mm çdo muaj. Me hapjen e fabrikave dhe linjave të reja të prodhimit, SHBA-ja tani po prodhon 40,000 predha në muaj. Por do të duhet akoma më shumë se një vit që Pentagoni të arrijë objektivin e tij prej 100,000 predhash çdo muaj. Procesi i rritjes së prodhimit është sipas planit, por ai do të zgjasë me vite, duke kërkuar objekte të reja, fabrika më të mëdha dhe një Kongres që do të jetë i gatshëm të japë më shumë para.