Partia Demokratike e Kosovës nuk ka dalë me një qëndrim të qartë në lidhje me propozimet e bëra nga Presidentja Vjosa Osmani për të zgjedhur kreun e shtetit me votën direkte të qytetarëve. Kreu i komisionit të legjislacionit, Përparim Gruda tha se Kuvendi nuk ka asnjë afat për të miratuar apo rrëzuar këto amendime, por se ato duhet që më parë të shqyrtohen nga Gjykata Kushtetuese. "Hapi i dytë është që amandamentet dërgohen në Gjykatën Kushtetuese për të parë nëse ato amandamente shkelin frymën dhe vlerat mbi të cilat qëndron rendi kushtetues Pas marrjes së vlerësimit, komisioni përkatës brenda afatit 7 ditësh i paraqet në Kuvend. Ne jemi pothuajse 14 vite pas vendimit të Gjykatës Kushtetuese. Kemi tejkaluar çdo afat të shqyrtimit të atyre amandamenteve, prandaj komisioni mendoj unë nuk mundet me shqyrtu amandamentet kushtetuese një dekadë e më shumë mbrapa. Rregullorja e përcakton shprehimisht që shtatë ditë pas vendimit të Kushtetueses”, deklaroi ai.