Partia Demokratike kërkon maksimizimin e votës në zgjedhjet e 2025, e në favor të kësaj po sheh të gjitha mundësitë duke analizuar se kush prej deputetëve do të duhet të marrë në dorë drejtimin e fushatës. Në të tillë kuadër, burime bëjnë me dije se deputeti Ervin Salianji, i cili ishte i deleguar në Kavajë në zgjedhjet lokale, nga ku PD arriti të rimarrë këtë bashki nga socialistët, është caktuar si drejtues qarku për Elbasanin. Ky qark në zgjedhjet e fundit pati si drejtues politik Flamur Nokën, ku pavarësisht një rezultati më të mirë se zgjedhjet e kaluara, nuk u arrit të merrej bashkia kryesore, ajo e Elbasanit. Por ende nuk ka një konfirmim nga struktura drejtuese e PD, nëse do të ketë ose jo një bashkëdrejtues me Salianjin, pasi në mbledhjet e strukturave është hedhur propozimi që në qarqet kryesore të ketë më shumë se një drejtues.