Partia Demokratike kundërshton draftin e shumicës parlamentare për ndryshime në rregulloren e kuvendit. Kryetari i grupit, Gazment Bardhi thotë se përmes ndryshimeve të njëanshme të rregullores, nxitet defunksionalizimi i Kuvendit dhe i pamundësohet opozitës përmbushja e vullnetit të saj për të ushtruar rolin e saj në një shoqëri demokratike. “Rregullorja e Kuvendit nuk është Statuti i PS, që ndryshohet çdo muaj sipas vullnetit të vetëm një partie politike. Rregullorja e Kuvendit është ligji që garanton bashkëjetesën e të gjitha forcave politike brenda institucioneve demokratike, përcaktuar në mënyrë konsensuale dhe tashmë me rregulla të konsoliduara. Nëse një palë dikton rregullat e bashkëjetesës në mënyrë të njënashme, atëherë kjo është dhunë e shumicës ndaj pakicës brenda Kuvendit! Bashkëjetesa brenda institucioneve demokratike pamundësohet dhe opozitës i diktohet me forcën e kartonit edhe nëse duhet të flasë apo jo, sa duhet të flasë dhe çfarë duhet të thotë.” – shprehet kryetari i grupit parlamentar të Partisë Demokratike.