Partia Demokratike ka kërkuar një interpelancë urgjente me Kryeministrin Edi Rama në lidhej me kërkesën që ka dorëzuar Qeveria në Gjykatën Kushtetuese për kundërshtimin e vendimit të Gjykatës së Posaçme për pezullimin e zv.Kryeministres dhe ministres së Infrastrukturës dhe Energjisë, Belinda Balluku. Në vlerësimin e opozitës, një kërkesë e tillë e Kryeministrit të Shqipërisë, jo thjesht është e pabazuar në Kushtetutë, por gjithashtu përbën një ndërhyrje të papërshtatshme në pavarësinë e sistemit të drejtësisë dhe synon çimentimin e kulturës së pandëshkueshëmrisë në vend. PD thotë se në vend të kërkesës së dorëzuar në Kushtetuese, Kryeministri Edi Rama duhet të kishte propozuar menjëherë shkarkimin nga detyra të Belinda Ballukut, që është marrë i pandehur nga SPAK për shkelje të barazisë në dy tenderat, atë të tunelit të Llogarasë dhe të tenderit për lotin 4 të unazës së madhe në Tiranë.