Kushtëzimi i mandatit të kryetarëve është pika kryesore e ndryshimeve statutore që po diskutohen si nga kryesia e Partisë Socialiste ashtu edhe nga anëtarët e grupit të rithemelimit të Partisë Demokratike. Forumi më i lartë i Partisë Socialiste, Kongresi Kombëtar i cili do të mblidhet këtë të shtunë në Pallatin e Kongreseve, do të miratojë ndër të tjera edhe ndryshimet statutore. Me propozim të kryesisë, kërkohet që nëpërmjet ndryshimeve në klauzolat e statutit, kryetari Edi Rama të shkarkohet nga kryesimi i socialistëve vetëm në tre raste: nëse humb vendin e parë në zgjedhjet e përgjithshme, nëse humbet mocionin e besimit të zhvilluar për të me kërkesën e një të tretës së anëtarëve të partisë apo nëse ai vetë jep dorëheqjen. Në ndryshimet statutore përcaktohet se në rast të largimit të Ramës nga kryesimi i Partisë Socialiste, vendin e tij vakant e zë përkohësisht sekretari i përgjithshëm, Damian Gjiknuri.