Një grup biznesmenësh, investuesish dhe aktivistësh shqiptaro-amerikanë u kanë bërë thirrje votuesve të Shqipërisë që më 25 prill të votojnë për ndryshimin. Në thirrjen e firmosur nga 48 figura amerikano-shqiptare të disa fushave, theksohet se në Shqipëri, alternativë shpresëdhënëse është Lulzim Basha me PD dhe opozitën, për shkak edhe të programit ekonomik. Ata theksojnë se qeverisja e Ramës ka sjellë një thellim të problemevedhe vota për PS më 25 prill do të ishte vijimi i një rruge pa krye. “Si bashkatdhetarë, vëllezër të një gjaku e gjuhe, Shqipëria është në mendjen dhe zemrën tonë dhe i ndjekim me shqetësim zhvillimet në atdhe. Shumë prej nesh janë biznesmenë, investues, punojnë apo kanë lidhje me kompani të mëdha investuese amerikane. Dëshira për të investuar në Shqipëri nuk ka munguar kurrë. Ajo që ka munguar është një klimë miqësore e mikpritëse ndaj investimeve serioze nga jashtë. Në vend të kthesës së vonuar, qeverisja e Edi Ramës ka sjellë thellimin edhe më tej të problemeve. Ky nuk është thjesht gjykimi ynë, por përfundimi i shumë raporteve institucionale ndërkombëtare për Shqipërinë. Që prej rrëzimit të komunizmit, Shqipëria nuk ka qenë asnjëherë më afër një sistemi monist, ku një parti e e vetme dhe një lider autokrat të ketë pasur kaq shumë pushtet. Me të gjitha mjetet e shtetit në duart e tij, ku janë arritjet e Edi Ramës?, thuhet në apelin e aktivistëve shqiptaro-amerikanë