Dosja AKSHI, është një gropë e madhe e përvetësimit të parave publike e cila zgjerohet në disa drejtime nëse ndjekim paratë. Teksa shtylla e parë e institucionit, drejtuesja Mirlinda Karçanaj u trondit nga SPAK, investigimi i Inside Story u përqëndrua tek shtylla e dytë që ka firmosuar tendera dhjetëra milionë euro. Një i ri 35-vjeçar të cilit i shkëlqeu ylli i detyrës në administratë. Aty ku paguhej rreth 100 mijë lekë të reja në muaj, por doli nga andej si milioner në euro. Fjala është për ish-nëndrejtorin e AKSHI-t Daniel Shima. Një personazh misterioz emri i të cilit u bë mjaft i njohur në 20 Gusht të vitit 2025. Aso kohe, ai u denoncua i zhdukur nga e dashura e tij Enkeleda Hysa. Kjo e fundit, mori një mesazh nga Danieli që e informonte se u arrestua. Por, pasi telefonoi policinë, mori përgjigjen se nuk ishte shoqëruar asnjë person me atë emër. Lajmi bëri mjaft zhurmë nisur edhe nga shkuara që përfaqësonte Shima. Por, ai u bë i gjallë duke deklaruar se ishte zhdukur me dëshirë. Saktësisht, 9 orë pasi u denoncua i zhdukur, u vetëparaqit pranë komisariatit numër 1 në Tiranë, në orën 2 duke gdhirë 21 gushti. E vërteta e plotë e këtij episodi nuk u mësua kurrë, por, ajo që bie në sy është fakti se kjo ngjarje, përkon me intensifikimin e hetimeve të SPAK për tenderat në Agjencinë Kombëtare të Shoqërisë së Informacionit. Vetë Daniel Shima, është marrë në pyetje si një ish person kyç për mbi 4 vite në atë institucion.