Pas hetimeve të Prokurorisë së Sarandës, janë konfiskuar shtatë sipërfaqe të mëdha toke buzë detit, me vlerë tregu rreth 15 milionë euro, të cilat kanë kaluar në favor të shtetit me vendim gjykate. Mësohet se bëhet fjalë për dosjen e hetuar nga Drejtuesi i Prokurorisë Sarandë, Kledian Llaho. Dosje e cila ka kërkuar arrestimin e 10 shtetasve të dyshuar për “falsifikim dokumentash”, “pastrim i produkteve të veprës penale” dhe “shpërdorim detyre” më 1 qershor 2022. Në këtë dosje akuzohen qytetarë dhe zyrtarë për tjetërsimin përmes dokumentave false të mbi 10 mijë m2 truall buzë detit, të cilat më pas u pajisën me certifikata pronësie. Në seancën përfundimtare për 5 prej të pandehurve, Prokurori Kledian Llaho krahas konfiskimit të pasurive, kërkoi shpalljen fajtor të tyre dhe dënimin e tyre.