Situata në territorin e Bashkisë Durres vijon të jetë e rënduar si pasojë e reshjeve intensive dhe daljes së lumit Erzen nga shtrati teksa operacionet për evakuimin e banorëve në Sukth dhe Katund të Ri vijojnë. Autoritetet njoftojnë se dalja nga shtrati e lumit Erzen ka zgjeruar territoret e përmbytura, sidomos në këto dy zona, ndërsa hidrovorët e Porto Romanos dhe Hamallajt po punojnë me kapacitet të plotë. Të dhënat zyrtare tregojnë se në total janë evakuuar 667 persona në Sukth dhe Katund të Ri, ku 300 janë akomoduar te familjarë, apo të afërm të tyre, 88 të tjerë nëpër hotele. Grupet e verifikimit të dëmeve në terren kanë inspektuar mbi 2600 banesa, ku për gati 700 prej tyre janë mbajtur akte konstatimi dëmesh.