Mëngjesin e 5 marsit 1998, prekazi u zgjua nga krismat e armëve dhe për tre ditë radhazi i bëri ballë ushtrisë serbe. Ushtria clirimtare e kosovës, e udhëhequr nga komandanti legjendar Adem Jashari, kishte nisur luftën për lirinë e vendit. Lagjja e Jasharajve në Prekaz, është dëshmia e terrorit serb, me 50 trupa të vrarë e masakruar që me zor u varrosën. Ish veprimtari Xhafer Murtezaj, tregon 26 vite më pas, për Kosovapress, cfarë ndodhi ato ditë. “E kujtoj si të jetë sot”, e nis rrëfimin Xhaferi... Murtezaj: Drenica ka qenë e rrethuar, prej dritareve kemi parë policë ...Më kujtohet një mëngjes i hershëm, ne i kemi afër shtëpitë këtu edhe kemi dëgjuar krismat. Ne patëm një përvojë të hidhur edhe më herët, në vitin 1991 që ishin rrethuar për herë të parë, mandej edhe në rrethimin e dytë me 1998, në janar. Kështu që tani ndodhi edhe marsi, me 5, 6 dhe 7 mars. Jemi zgjuar si zakonisht, por ka qenë e pamundur, prej dritareve kemi parë polici edhe vendosjen e policisë në pikat më strategjike dhe më të larta, snajperistë, armatim e tanke” Banorët e fshatrave përreth, thotë ai, e kuptuan nga krismat e armëve se lufta kishte nisur. Murtezaj: Kanë filluar krismat me datën 5, janë vërejtur armët e rezistencës “Kemi qenë në gjendje të jashtëzakonshme, kemi qenë në gjendje të papërshkrueshme. Kemi ditë që po ndodhë lufta. Kanë filluar krismat tërë ditën më datën 5 , ka pasur nganjëherë ndërprerje. Janë ditur armët e rezistencës, të komandantit bashkë me të lagjes së vet, Jasharëve, sepse këtu kanë qenë të gjithë të përfshirë, por kryesisht ka qenë shtëpia e bacës Shaban, Ademit, edhe me djemtë e tyre. Të gjithë kanë qenë të përgatitur, të gjithë e kanë pritur një ditë që do të rrethohen në truallin e vet, shtëpinë e vet” Edhe pse jo larg nga Prekazi, ai thotë se kishte qenë e pamundur që të ndihmoheshin jasharajt pasi para cdo shtëpie kishte trupa serbe. Por – thotë ai, ishim të bindur se ata nuk do të dorëzoheshin të gjallë.