Një pasagjer hebre ortodoks thotë se një pilot i United Airlines e nxorri atë me forcë nga tualeti i avionit ndërsa ai po përjetonte konstipacion ose kapsllëk, duke e ekspozuar atë me pantallonat e ulura para udhëtarëve të tjerë gjatë një fluturimi nga Tulum në Meksikë, për në Hjuston. Yisroel Liebb, nga Nju Xhersi, e përshkroi udhëtimin e tij me detaje në një padi federale këtë javë kundër linjës ajrore dhe Departamentit të Sigurisë Kombëtare të SHBA-së, oficerët e të cilëve ai tha se hipën në avion pas uljes dhe e morën me pranga. Liebb dhe një bashkëudhëtar hebre ortodoks thanë se për këtë shkak ata humbën fluturimin lidhës për në qytetin e Nju Jorkut, ndërsa oficerët e Doganës dhe Mbrojtjes së Kufirit të SHBA i bënë atyre paradë me pranga në duar nëpër një terminal aeroporti, i mbyllën në qeli dhe kontrolluan bagazhet e tyre. Në padinë, të paraqitur të mërkurën në gjykatën federale të Manhatanit, Liebb tha se kishte qenë në tualet në pjesën e pasme të avionit për rreth 20 minuta më 28 janar, kur një stjuardesë e njoftoi pilotin që ta kontrollonte atë. Liebb tha se ai ia shpjegoi gjendjen e tij gastrointestinale dhe e siguroi pilotin se do të dilte shpejt. Por rreth 10 minuta më vonë piloti shkallmoi derën, duke e tërhequr atë me pantallonat ende të ulura në fund të këmbëve, jashtë, nën sytë e pasagjerëve të tjerë. Në padi, pasagjeri thekson se ndihet i dhunuar seksualisht dhe i turpëruar pasi ishte detyruar të ekspozohej nudo para personave të tjerë.