Kristaq Leci dhe Bledar Jambelli janë dy shqiptarë, emrat e të cilëve janë në listën e më të kërkuarve nga Interpol, ndërsa fotot e tyre janë shpërndarë në të gjithë botën. Për ta ka vetëm një qëllim arrestimin e menjëhershëm sapo të pikasen nga autoritetet policore në kufij tokësorë, ajrore, apo detarë. Dyshimet se ata kanë ndërruar identitet janë të shumta, por burimet nga Policia e Shtetit thonë se gjurmët e gishtave të tyre janë tashmë në të gjithë sistemin e kontrollit në të gjitha shtetet me të cilat operon Interpol Ndërkombëtar. Bëhet fjalë për urdhëruesin dhe ekzekutuesin e komisar Artan Cukut. Sipas dosjes për këtë ngjarje, Kristaq Leci ka kryer ekzekutimin e komisarit, ndërsa Jambelli ka qenë porositës i krimit, për të cilin madje ka paguar si një shumë të parë një vlerë prej 10 mijë euro. Në grupin e ekzekutorëve ka qenë edhe Mikel Shallari, por ai ka marrë një dënim nga drejtësia, pasi pati edhe lehtësira juridike, sepse vendosi të bashkëpunojnë, por pa marrë statusin e dëshmitarit të mbrojtur. Bledar Jambelli dyshohet se është larguar drejt Greqisë pasi është vrarë Artan Cuku. Pikërisht hetimet për gjetjen e Bledar Jambellit janë përqendruar në Greqi, por edhe në Spanjë, për shkak të lidhjeve që ai kishte atje. Prokuroria e Krimeve të Rënda ka dërguar disa letërporosi autoriteteve spanjolle dhe atyre greke për zbulimin e vendndodhjes së Bledar Jambellit dhe u ka kërkuar atyre arrestimin e personit më të kërkuar aktualisht nga autoritete shqiptare. Gjithsesi, Interpoli ndërkombëtar nuk ka reshtur kërkimet për arrestimin e dy personazheve të rrezikshëm me kombësi shqiptare.