Tensionet në parlament, që e patën pikënisjen tek kërkesa e Taulant Ballës, për të mbajtur një minutë heshtje në përkujtim të katër dëshmorëve të demokracisë në Shkodër, u shoqëruan me kërkesa përjashtimore të të dyja palëve drejtuar sekretariatit të etikës. Partia Socialiste kërkon përjashtimin me 60 ditë të sekretarit të përgjithshëm të Partisë Demokratike, Flamur Noka, me argumentin se me sjelljen e tij agresive, ai bllokoi foltoren e Kuvendit, duke mos lejuar deputetët të merrnin fjalën, duke cënuar seancën dhe shkaktuar kaos. Po ashtu në letrën e socialistëve thuhet se: Noka ofendoi me fjalë shumë të rënda fyese kryetarin e kuvendit dhe deputetët e mazhorancës, si dhe goditi me mjete të rënda kryetarin e grupit, Taulant Balla.