Kryeministri Albin Kurti ka ngritur sot shqetësimin se Beogradi zyrtar po punon ende për të realizuar projektin e shkëmbimit të territoreve mes Serbisë dhe Kosovës. Në një intervistë për ‘Al Jazeera’, kreu i qeverisë së Kosovës ka theksuar edhe njëherë se ai është kundër kësaj ideje, duke paralajmëruar se ky skenar do ta çonte rajonin drejt një konflikti të ri. “Nuk do të ishte një zgjidhje. Do t’i bënte gjërat edhe më keq. Unë dua zgjidhje demokratike dhe paqësore. Dhe shkëmbimi i territoreve është një shteg që na kthen prapa tek konflitket e viteve 90. Përplasa nuk do të mbetet vetëm mes Kosovës dhe Serbisë, por do të shpërndahej në gjithë Ballkanin Perëndimor”, ka paralajmëruar Kurti. Sipas tij, projekti i shkëmbimit të territoreve, sipas të cilës, Kosova merr Luginën e Preshevës dhe Serbia Mitrovicën, nuk është ‘vrarë’ ende. “Nuk e pëlqej këtë mënyrë të bërit politikë, kur presidentët apo kryeministrat mendojnë se janë mbretër të mesjetës dhe e konsiderojnë territorin e shteti, territor privat. Projekti i shkëmbimit ka dështuar, por ideja nuk ka vdekur dhe është shumë e gjallë në Beograd, sepse të gjithë fqinjët e Beogradit që nuk janë të integruar në BE, shihen si shtete të përkohshme”, ka thënë kreu i Qeverisë së Kosovës.