Agjencia Evropiane e Barnave, EMA, tha të martën se nuk ka prova të reja që do të kërkonin ndryshime në rekomandimet aktuale të rajonit për përdorimin e paracetamolit, i njohur si Tylenol në Shtetet e Bashkuara të Amerikës, gjatë shtatzënisë. Presidenti amerikan, Donald Trump, të hënën lidhi autizmin me vaksinat e fëmijërisë dhe marrjen e ilaçit të njohur Tylenol, kundër dhimbjeve, nga gratë gjatë shtatzënisë. Kësisoj, ai ngriti në qendër të politikës shëndetësore të SHBA-së një pretendim që nuk mbështetet nga prova shkencore. “Provat e disponueshme nuk kanë treguar asnjë lidhje mes përdorimit të paracetamolit gjatë shtatzënisë dhe autizmit", tha EMA në një deklaratë për Reuters. Agjencia shtoi se paracetamoli mund të përdoret gjatë shtatzënisë kur është i nevojshëm, por gjithmonë në dozën dhe shpeshtësinë më të ulët efektive.