Kina ka pezulluar publikimin e shifrave të papunësisë mes të rinjve, të martën, duke thënë se ajo duhet të rishikojë metodologjinë e përdorur deri më tani, ndërsa rekorde të reja janë shënuar. Dhe kjo është edhe një nga shumë sinjalet që tregon se ekonomia e dytë më e madhe në botë, nuk është në rrugën e duhur. Vendimi u njoftua pak pas publikimit të të dhënave mbi prodhimin dhe shitjet, që ishin ndjeshëm më të dobëta se sa pritej, cka edhe shkaktoi polemika në median sociale në një kohë kur frustrimi për perspektivën e mbetjes pa punë në vend, është në qiell. Kjo masë shënon edhe lëvizjen më të fundit të autoriteteve kineze për të kufizuar aksesin në të dhëna dhe informacione të rëndësishme, një tendencë që po nervozon investitorët e huaj. Shifra më e fundit e publikuar nga autoritetet ishte ajo e qershorit që tregonte një rritje papunësie në masën 21.3 për qind.