Papa Françesku do të dalë nga spitali Gemelli i Romës të dielën dhe do të ketë nevojë për të paktën dy muaj pushim në Vatikan, thanë mjekët që e trajtojnë atë. 88-vjeçari u shtrua në spital më 14 shkurt me një infeksion të rëndë respirator që rezultoi në një pneumoni të dyfishtë. Gjatë pesë javëve të fundit, ai pati "dy episode shumë kritike" ku "jeta e tij ishte në rrezik", tha Dr Sergio Alfieri, një nga mjekët që ka trajtuar Papën. Papa Françesku nuk u intubua asnjëherë dhe mbeti gjithmonë vigjilent dhe i vetëdijshëm, tha Dr Alfieri. Papa nuk është shëruar plotësisht, por nuk ka më pneumoni dhe tani është në një gjendje të qëndrueshme, thanë mjekët. Papa, do të dalë në dritaren e tij në spitalin Gemelli, para se të kthehet në vatikan, dhe që andej do të japë bekimin e tij. E kjo do të jetë hera e parë që ai shfaqet në publik që kur u shtrua në spital. Nëse tencenca e përmirësimit vazhdon, thonë mjekët, papa do të jetë në gjendje të kthehet shpejt në aktivitetet e tij. Papa Françesku ka kaluar gati 12 vjet si udhëheqës i Kishës Katolike Romake. Ai ka patur një sërë problemesh shëndetësore gjatë gjithë jetës së tij, duke përfshirë heqjen e një pjese të mushkërive të tij në moshën 21-vjeçare, cka edhe e ka bërë atë më të prirur ndaj infeksioneve.