Pesë viktima dhe 596 raste të reja me koronavirus u konfirmuan të martën në Kosovë. Instituti Kombëtar i Shëndetësisë Publike tha se rastet e reja rezultojnë nga testimi i 1,559 mostrave, ndërsa viktimat janë regjistruar: dy në Gjilan, dy në Prizren dhe një në Suharekë. Komuna e Prishtinës ka numrin më të madh të rasteve të reja pozitive: 295. Instituti tha se në 24-orëshin paraprak, 136 pacientë janë shëruar nga koronavirusi. Me shifrat e fundit, numri i përgjithshëm i të infektuarve në Kosovë shkon në 25,388. Prej tyre, 773 pacientë kanë vdekur dhe 16,362 janë shëruar. Raste aktive aktualisht janë 8,253. Ministri i Shëndetësisë, Armend Zemaj, paralajmëroi një ditë më parë rreth mundësive për vendosjes e masave të reja shtrënguese pasi siç tha ai, “trajektorja e rasteve të fundit me COVID-19, kërkon kujdes të shtuar dhe aktiv”. Autoritetet në Kosovë po bëjnë përpjekje ta frenojnë valën e re të infektimeve me COVID-19, për shkak të rritjes së numrit të rasteve të reja. Kosova ishte e mbyllur gjatë fundjavës çka nxiti reagimin e bizneseve të cilët thonë se ekonomia tashmë është dëmtuar dhe çdo vendim i ri pa u këshilluar me ta, do ta rëndojë situatën edhe më shumë.