Hamasi ka dorëzuar trupat e katër pengjeve izraelitë, si pjesë e marrëveshjes për shkëmbim e qindra të burgosurve palestinezë. Kjo shihet si një përpjekje për të mbyllur fazën e parë të armëpushimit, Izraeli ka filluar të lirojë më shumë se 600 të burgosur palestinezë, duke përfshirë dhjetëra që janë kthyer në Bregun Perëndimor dhe Gaza. Ky është një hap i rëndësishëm në kuadër të marrëveshjes e cila pritet të përfundojë këtë të shtunë. Sipas asaj që raportojnë mediat e huaja shkëmbimi i trupave të katër pengjeve izraelite u realizua në një mënyrë private, pa ceremoni publike, ndryshe nga herët e tjera, për të shmangur vonesa ose pengesa që mund të vinin nga reagimet e mundshme politike. Nga ana tjetër të burgosurit që janë liruar përfshijnë shumë palestinezë që ishin arrestuar gjatë luftës, përfshirë 50 individë që vuajnë dënimin e përjetshëm. Në sulmin e 7 tetorit nga Hamasi në jugun e Izraelit, rreth 1200 persona humbën jetën dhe 251 të tjerë u morën peng. Ky incident ishte shkak për shpërthimin e luftës më të përgjakshme në historinë e Gazës, ku deri tani më shumë se 48 mijë njerëz janë vrarë, sipas Ministrisë së Shëndetësisë e cila është nën kontrollin e Hamasit.