Komisioni Europian është në pritje të njoftimit zyrtar nga Kosova, për hyrjen në fuqi të marrëveshjeve të ratifikuara ndërkombëtare në mënyrë që të nisë me pagesën e para-financimit nga Plani i Rritjes. Një zëdhës I KE, ka konfirmuar se Kosova ka bërë kërkesë për lirimin e deri në 7 për qind të shumës totale të para-financimit. Sipas zyrtarit, Kosova duhët të përmbushë kushtet e përgjithshme dhe parakushtet me qëllim që të bëhet lëshimi I fondeve nën Planin e Rritjes. Sipas rregullores së Instrumentit për Reforma dhe Rritje për Ballkanin Perëndimor, parakushtet dhe kushtet e përgjithshme duhet të vlerësohen çdo herë kur kryhet një pagesë. Vlerësimi nëse janë plotësuar kushtet jepet para çdo pagese dhe ky rregull vlen për të gjitha shtetet përfituese nga Plani i Rritjes. Legjislatura e re e Kuvendit të Kosovës, ratifikoi më 13 shkurt marrëveshjet ndërkombëtare me Bashkimin Evropian, marrëveshje të cilat kapin vlerën prej 882 milionë eurove. Pakoja e BE-së për Ballkanin Perëndimor – për periudhën 2024-2027 - është në vlerë të 6 miliardë eurove.