Emri i bosit kolumbian të drogës Pablo Escobar nuk mund të regjistrohet si një markë tregtare në vendet e BE-së, vendosi të mërkurën Gjykata Evropiane e Drejtësisë, pasi vëllai i tij u përpoq të parashtronte një pretendim. Gjykata la në fuqi vendimin e zyrës së pronësisë intelektuale të BE-së që refuzoi një aplikim për markë tregtare nga Escobar Inc. në vitin 2022. "Zyra doli në përfundimin e saktë se emri i Pablo Escobarit është i lidhur me trafikun e drogës dhe narko-terrorizmin dhe me krimet e vuajtjet që rezultojnë prej tyre, por jo me veprat e tij të mira, të mundshme, në mbështetje të të varfërve në Kolumbi," tha gjykata në një deklarate. Escobar Inc. u themelua në Porto Riko nga vëllai i Pablo Escobar, Roberto de Jesús Escobar Gaviria, i cili qëndroi për 12 vjet në burg për rolin e tij në organizatën kriminale të të vëllait. Gaviria tha në vitin 2020 se kompania e tij do të lansonte një smartphone të palosshëm të quajtur Escobar Fold 1. Kompania aktualisht shet një kripto monedhë të quajtur Escobar Cash, sipas faqes së saj të internetit. Pablo Escobar drejtoi një nga organizatat kriminale më të fuqishme në botë, kartelin Medellin. Pasuria e tij, e krijuar nga trafiku i kokainës, u vlerësua nga Forbes në 1987 se kishte arritur mbi 3 miliardë dollarë, megjithëse disa llogari e vlerësojnë atë shumë herë më të lartë. Me mijëra njerëz u vranë në dhunën e lidhur me kartelin gjatë dhe pas vdekjes së Escobarit në 1993, kur u qëllua nga forcat e sigurisë.