Zgjedhjet në Shqipëri realizohen sipas sistemit proporcional rajonal, ku subjektet politike garojnë në 12 qarqe. Sistemi aktual është në fuqi që prej dhjetorit të vitit 2008, kur u miratua pas një konsensusi mes PD, atëherë në pushtet dhe PS në opozitë. Ndryshimet u kundërshtuan nga partitë e vogla me arsyetimin se ky kod i penalizon dhe për më tepër shkakton pabarazi të vlerës së votës, ndërsa dy partitë e mëdha mbrojtën marrëveshjen e tyre me argumentimin se sistemi proporcional rajonal shmangte krizat për formimin e shumicës në parlament dhe garantonte qeverisje më të qëndrueshme.