Vizitorët ishin të panumërt, përfshirë personazhe të famshme si Uill Smith, Rihana dhe Kim Kardashian. U duk sikur kuba po përfitonte nga kjo. Për vetë kubanezët, ajo ishte koha më e artë e turizmit në Kubë. Por tani, ishulli mund të jetë duke përjetuar momentin e pasigurisë ekonomike më të thellë që banorët e ishullit kanë përjetuar në dekada. Përmes veprimeve ushtarake në Venezuelë dhe kërcënimeve me tarifa ndaj Meksikës, administrata Trump ka ndërprerë rrjedhën e naftës në Kubë, duke u përpjekur ta detyrojë ishullin e drejtuar nga komunistët të ndërmarrë reforma të rëndësishme politike dhe ekonomike. Kuba nuk duket se ka ndonjë aleat të mbetur të gatshëm që ta furnizojë me karburant me vlerë qindra miliona dollarë të nevojshme për të fuqizuar ekonominë. Nafta që i ka mbetur ishullit po mbaron. Humbja e dyfishtë, e karburantit dhe turistëve, ka qenë katastrofike. E ndërsa kriza vazhdon, jeta po ndalet ngadalë në këtë ishull me gati 10 milionë banorë. Mësimet janë pezulluar në shumë shkolla dhe punëtorët janë lënë në shtëpi për të kursyer energji. Hotelet janë zbrazur pasi janë anuluar edhe fluturimet nga Rusia dhe Kanadaja pasi nuk ka karburant të mjaftueshëm për avionët në ishull për fluturime më të gjata ndërkombëtare. Mbretëria e Bashkuar dhe Kanadaja i kanë paralajmëruar qytetarët e tyre të shmangin udhëtimet jo-thelbësore në Kubë. Shumë spitale shtetërore kanë ndërprerë shërbimet dhe mungesa e karburantit dhe kamionëve të mbledhjes së mbeturinave ka bërë që plehrat të grumbullohen në shumë lagje. Në pothuajse çdo cep rruge, bisedat përqendrohen te ndërprerjet e energjisë elektrike. Natën në Havana, yjet janë qartë të dukshëm pasi pjesa më e madhe e qytetit është e mbuluar në errësirë pothuajse totale. Administrata Trump thotë se qeveria kubane duhet të hapë më në fund ekonominë e centralizuar të ishullit para se të shembet.