Presidentja e Republikës së Kosovës, Vjosa Osmani, u prit në një takim zyrtar nga Perandori i Japonisë, në një ngjarje që shënon një moment të rëndësishëm në historinë e marrëdhënieve ndërmjet dy vendeve. Përmes një postimi në Facebook, Presidentja Osmani e cilësoi takimin si një nder të veçantë, duke theksuar se raportet mes Kosovës dhe Japonisë janë ndërtuar mbi themele të forta të respektit të ndërsjellë, besimit dhe vlerave të përbashkëta. “Miqësia e thellë me Japoninë dhe marrëdhëniet e veçanta ndërmjet dy shteteve tona janë dëshmi e një partneriteti që është zhvilluar ndër vite mbi baza të qëndrueshme dhe vlera të përbashkëta,” theksoi ajo. Presidentja shtoi se populli i Kosovës mbetet thellësisht mirënjohës për mbështetjen e vazhdueshme që Japonia ka ofruar ndër vite, sidomos në fusha të rëndësishme për zhvillimin dhe stabilitetin e vendit.